ILOILO CITY – Indi ospital kundi ‘lawas sang tawo kag komunidad’ ang matuod nga patag-awayan batok sa coronavirus disease 2019.
Sa interview sang Bombo Radyo kay Dr. Juan Ismael Sumagaysay, chairman sang Hospital Infection Control Committee sang The Medical City Iloilo, iya ginpahayag nga tagsa ka tawo ang may makabig daku nga katungdanan nga mangin frontliner batok sa nasambit nga sakit.
Suno kay Dr. Sumagaysay, sa subong, apisar may mga teorya nga naga-gwa, indi pa matumod sang mga eksperto kun diin gid naghalin ang virus, gani daw kaangay nga nagapakig-away ang tawo sa bagay nga wala niya nahibaluan.
Apang pahayag ni Dr. Sumagaysay, may mga paagi gihapon kun paano malikawan ang infection.
Lakip sa sini nga mga pamaagi amo ang pagpadayon sang good hygienic practices, good respiratory etiquette, masami nga paghugas sang kamot, pagpabaskog sang resistensya, kag paglikaw sa pampubliko nga lugar.
Suno pa kay Dr. Sumagaysay, importante nga sundon ang mandu sang otoridad nga magpabilin anay sa balay kag kun makabatyag sang sintomas, mag-paidalom sa 14 ka adlaw nga home quarantine.
Ilabi na bangud may yara na sang community transmission, suno kay Dr. Sumagaysay, gina-engganyo gid ang tanan nga indi mag-gwa agud limitado lang ang mahimo masayluhan sang virus.
