ILOILO – Duha ka ospital sa syudad sang Iloilo ang gintiniran sang isa ka coronavirus disease 2019 (COVID-19) positive nga tumandok sang Sta. Barbara, Iloilo.
Sa interview sang Bombo Radyo kay Dr. Renilyn Reyes, COVID-19 spokesperson kag pinuno sang Public Health Program Development sang Department of Health Region 6, iya ginpahayag nga Hunyo 25 sang ginkuhaan sang swam sample ang amo nga pasyente sa nauna nga ospital, apang gin-refer ini sa lain nga ospital pagkasunod nga adlaw.
Kahapon, Hulyo 2, nalakip ang amo nga pasyente sa 21 ka bag-o nga kumpirmado nga kaso sang COVID-19 sa Western Visayas.
Bangud sini, madamo ang nagakahangawa sa posibilidad nga i-lockdown ang una nga gintiniran nga ospital apang suno kay Reyes, wala sang kamatuoran ang amo nga impormasyon.
Ginpahayag sang natungdan nga nagapadayon pa ang contact tracing kag imbestigasyon sa naka-close contact nga health workers kag non-health workers sa ospital kag sa komunidad.
Nahibaluan nga ang amo nga pasyente ang isa ka negosyante sa munisipyo sang Sta. Barbara kag nadiskubrehan sa iya travel history nga sa syudad kag probinsya sang Iloilo gid lamang ini nakakadto.
ADMITTED PATIENTS UPDATE.
Sa bahin naman sang mga admitted nga mga COVID-19 patients sa rehiyon, ginpahayag ni Reyes nga naglab-ot na sa 28 ang kabug-usan nga numero sa diin may 1 sa Antique, 3 sa probinsya sang Iloilo, 9 sa syudad sang Iloilo, kag 15 sa repatriates.
Suno kay Reyes, si WV 336, 52 anyos nga lalaki nga taga-Sta. Barbara, Iloilo ang ginakabig nga ‘critically ill’ ukon may malala na nga kondisyon.
Magluwas diri, yara naman sa estable nga kahimtangan ang 27 ka iban pa.
ST. PAUL’S UPDATE.
Sa bahin naman sang ginapatuman nga lockdown sa St. Paul’s Hospital of Iloilo, ginpahayag ni Reyes nga ginahulat pa ang resulta sang swab test sa mga naka-close contact sang COVID-19 positive nga walo ka doktor kag isa ka nurse.
Kun maka-gwa na ang resulta suno sa natungdan, makadesisyon na ang tagdumalahan kun ibalik na ang operasyon.
Nahibaluan nga masobra 1,000 ka tawo nga ginalakipan sang health workers kag non-health workers ang napaidalom na sa swab test.
