Maga-gwa subong nga adlaw, Hunyo 26, ang resulta sang COVID-19 test sa 96 ka mga empleyado sang Palm Concepcion Power Plant Corporation (PCPC) sa Concepcion, Iloilo
Sa 96 ka empleyado, 53 ang Chinese National kag 43 naman ang mga Filipino.Ini nga mga empleyado ang ginpaidalom sa swab test kahapon, Hunyo 25, matapos na-rekord sa amo nga power plant company ang 10 ka active cases sang COVID-19 nga lunsay mga Chinese national.
Sa interview sang Bombo Radyo kay Concepcion, Iloilo Mayor Dr. Raul Bañas, iya ginpahayag nga isolated na subong ang COVID-19 positive nga mga empleyado.
May iban sa ila nga nagapakita sang flu-like symptoms.
Suno kay Bañas, natublukan na sang first dose sang COVID-19 vaccine ang kalabanan sa Chinese nationals nga infected sang virus.
Apisar naka-lockdown ang amo nga power plant company, padayon ang operasyon sang planta apang wala na sang makasulod nga non-essential nga tawo kag ginpatuman man ang work-from-home arrangement sa iban nga local employees agud mapat-od nga wala sang community transmission.
