Ginpili sang beterano nga point guard nga si Chris Paul nga magbalik sa Los Angeles Clippers para sa ginapanan-aw nga katapusan sini nga season sa National Basketball Association (NBA).
Suno kay Lawrence Frank, president sang basketball operations sang Clippers, nagsugtanay ang team kag si CP3 sa minimum deal nga $3.6 million ukon P205.36-million.
Antes ang desisyon, lakip sa nagpangaluyag sa 40-anyos nga guard amo ang Milwaukee Bucks, Charlotte Hornets, kag Dallas Mavericks.
Matandaan nga halin si Paul sa San Antonio Spurs sang nagligad nga season kag nakahampang sang 82 games. Siya ang una nga player sa NBA history nga nakahampang sang 82 games sa isa lang ka season sa iya 20th season ukon mas madugay pa.
Sa pagbalik sang 12-time All-Star sa Los Angeles, magahampang siya sa iya 21st season nga mas malapit sa iya pamilya.
Matandaan nga anum ka seasons siya nga naghampang anay sa amo nga franchise (2011-12 tubtub 2016-17) kun sa diin siya nangin five-time All-Star. Naga-uyat siya sang record nga 4,023 assists sa Clippers nga amo ang pinakamataas sa franchise history.
Siya man ang latest veteran addition sa Clippers matapos nakuha man ang shooting guard nga si Bradley Beal, power forward nga si John Collins kag center nga si Brook Lopez sa offseason.
