ILOILO CITY – Gin-athag ni Iloilo City Mayor Treñas nga indi pa gilayon nga mapatuman ang curfew hours sa syudad sang Iloilo bilang kabahin sang preventive measures batok sa COVID-19 nga gin-aprubahan sang Iloilo City Council.
Sa interview sang Bombo Radyo kay Mayor Treñas, iya ginpahayag nga maga agi pa sa madamo nga proseso antes ma aprubahan ang nasambit nga mandu.
Suno sa alkalde, luyag niya nga mangin maathag ang pag-implementa curfew hours agud indi magsalangisag ang mga kapulisan kag mga barangay officials sa pagpatuman sang nasambit nga mandu.
Nahibaluan nga exempted sa curfew hours, ang mga empelyado nga halin sa trabaho kag luyag na nga magpauli, health workers, auhtorized government officials, ang mga may yara sang medical kag humanitarian reasons, mga magapadulong sa airport kag seaport facilities, mga naga-deliver sang pagkaon kag bulong, skeletal workforce sang gobyerno kag public transport services.
May kaangtanan naman sa ginpatuman nga travel restrictions sa syudad kag probinsya sang Iloilo, gin-athag ni Mayor Treñas nga wala sila sang ipatuman nga truck ban bangud kalabanan sa mga truck nga nagasulod ang may dala nga pagkaon.
Nagpasalig ang natungdan nga wala sang mangin problema kag magapadayon ang pagsulod sang food services sa syudad sa pihak sang pagpatuman sang travel restrictions.
Naghingyo naman ang alkalde sa Public Safety Transportation and Management nga temporaryo nga tugutan nga makasulod kag magbyahe sa syudad sang Iloilo ang mga tricycle.
Ini bangud may yara pa sang mga empleyado nga nagatrabaho kada gab-i kaangay nalang sang mga BPO employees nga exempted sa ginpatuman nga curfew hours.
Samtang, ginkalipay sang Iloilo City Government ang pagdeklara ni Presidente Rodrigo Duterte sang State of Calamity sa Pilipinas bangud sa Coronavirus Disease 2019.
Suno kay Mayor Jerry Treñas, kahigayunan para sa ila ang pagpaidalom sa State of Calamity sa pungsod agud magamit ang calamity fund sang syudad para sa pagpanghanda batok sa COVID-19.
Suno kay Treñas, mahimo naman nga magamit sang mga Local Government Unit ang ila mga pondo para sa tagsa nila ka operasyon agud malikawan nga maglapta ang nasambit nga virus.
