ILOILO –
Daan nga hiligut-anon ang ginatan-aw nga rason sa pagpangluthang sang riding in tandem sa tanod commander sa Zone 2, San Juan, Molo, Iloilo City.
Ang biktima ginkilala si Lemel “alyas Junjun” Villaruel sang nasambit nga lugar.
Sa interview sang Bombo Radyo kay Pol Major Engelbert Banquillo, hepe sang Molo Police Station iya ginpahayag nga mapauli na tani si Villaruel kag naghapit sa tyangge agud magbakal sang fishball sang ini ang gin agyan kag ginluthang sang riding in tandem nga madugay na nga nagahulat sa iya.
Suno kay Banquillo, naka agom sang apat ka igo sa nagkalain-lain nga parte sang iya lawas ang biktima apang sa pihak sang iya mga igo naka balos pa si Villaruel bangud may yara man ini sang dala nga armas.
Dugang sang natungdan, mabudlay para sa ila nga kilalahon ang mga suspek bangud wala naga gana ang mga Closed Circuit Television sa lugar kun diin natabo ang insidente.
Samtang ginpaidalom naman sa operasyon ang biktima bangud sa mga pilas nga na agom niya sa pagpangluthang.
Sa subong padayon sa gihapon ang ginapatigayon sang mga kapulisan agud matumod ang matuod nga suspek sa pagpangluthang sa biktima.
Samtang suno naman sa mga pumuluyo nga nakakita sa insidente, nabudlayan sila nga kilalahon ang mga suspek bangud lunsay ini naka helmet kag naka bonet.
Suno naman kay Punong Barangay Sipil Espinosa sang Brgy. San Juan Molo, Iloilo City madugay na nga naga serbe bilang tanod si Villaruel kag maayo nga tawo ang iya pagkakilala sa biktima kag aktibo ini sa mga programa sang barangay nga ginapatigayon nila.
Dugang sang natungdan, wala sang namuno sa iya ang biktima nga problema ukon naka hiligut-anon sini bag-o natabo ang insidente.
