Indi makahibalo si Senator Risa Hontiveros kun maham-ot ini ukon maakig sa nagaguwa nga 17 ka mga kondisyones nga gin-set ni Kingdom of Jesus Christ leader Pastor Apollo Quiboloy antes ini magtambong sa hearing sa senado.
Ini nga mga kondisyon ang gin-post lang sang grupo sang mga bloggers nga suno sa sources sang Sonshine Media Network International (SMNI), naka-interview kay Quiboloy sang nagligad nga weekend.
Ginklaro sang senadora nga wala sang opisyal nga komunikasyon sa tunga ni Senate panel on women kag kampo ni Quiboloy kun matuod ang naglutaw nga 17 ka mga kondisyon.
Apang pananglitan matuod suno kay Hontiveros, daog pa ni Quiboloy ang napulo ka sugo sang Diyos.
First time man ini suno sa iya nga may tawo nga makapila ka beses na nga ginpatawag sa hearing apang wala nagtambong; gindagdagan sang subpoena; apang sang nagsabat, may i-set pa nga mga kondisyon kag kinahanglan pa nga mag-adjust ang Senado para sa iya.
“Mga kasama, sa tingin ko ay wala kahit sino sa atin ang nag-akala na darating ang panahon na kapag may ipinatawag na pumunta sa hearing, ang isasagot ay ‘Sige, pupunta ako sa hearing, pero SA LABING PITONG KONDISYON….’. First time ko makabalita ng ganito, sa totoo lang,” pahayag sang senadora.
Dugang sini: “Dinaig pa ni Pastor Quiboloy ang Sampung Utos ng Dyos. Ang masasabi ko lang dyan, BAKIT SENADO ANG MAG-AADJUST SA KANYA? The Senate will not bend its rules and procedures for you, Pastor Quiboloy, even if you are, as you say, a self-appointed son of God. Hindi kami para utusan mo. You will not mock the system of checks and balances on our watch. This is not up for debate.”
Pila sa mga kondisyon nga nakasulat amo ang:
- *Dapat nga wala sang maskara ang mga testigo, wala sang madulom nga eyeglasses, wala sang kalo, bonnet, ukon anuman nga nagatabon sa nawong
- *Dapat nga indi pagpunggan si Quiboloy kag indi paglimitahan lamang sa “yes” kag “no” ang iya sabat
- *Dapat nga may kinamatarong man si Quiboloy nga mag-cross examine sa mga testigo lakip kay Hontiveros nga amo ang chairperson sang panel
- *Dapat nga tugutan ang 50 ka mga security personnel ni Quiboloy nga magtambong sa hearing kag magbantay sa iya — lakip na dira ang mga pulis kag mga myembro sang militar
- *Dapat nga tugutan si Quiboloy nga magdala sang iya kaugalingon nga mga testigo nga mag-testify sa mga testigo sang senado KAG dapat nga wala sang limit
Apang para kay Hontiveros, ang pinaka-nagapangibabaw diri amo ang Condition Number 14 kun sa diin nakabutang nga dapat all-expenses paid ang byahe ni Quiboloy lakip sa private jet (pakadto-pabalik), parking sa NAIA, pagkaon, kag akomodasyon sa five-star hotel.
“So, wow! Kukulangin pa talaga yung ipinalimos niya sa mga tao niya para sa jet fuel. Ito ngayon ay mayroong all expenses for that private jet flight. Merong pang food requirements. At hindi lang four-star, three-star, two-star, one-star, five-star hotel. Magastos po ang resource person natin,” pahayag sang senadora.
Subong na nga adlaw, Marso 12, amo man ang deadline agud nga makumpleto ni Senator Robin Padilla ang walo ka mga pirma sang mga senador agud nga mabalabagan ang contempt order nga ginpaguwa sang Committee on Women, Children, Family Relations and Gender Equality batok kay Quiboloy.
Pananglitan indi sini makumpleto ang walo ka signatories, buot silingon, i-retain ang contempt ruling sang chairperson nga si Senator Hontiveros kag makakuha na sang otoridad gikan kay Senate President Juan Miguel Zubiri nga mag-isyu sang arrest order batok kay Quiboloy agud mag-atubang na ini sa hearing.
Sa subong, apat pa gid lamang ang nakapirma agud magpamalabag nga amo sanday: Senator Padilla, Senator Imee Marcos, Senator Cynthia Villar, kag Senator Bong Go. #
