Nagpanawagan si Senator Imee Marcos sa iya utod nga si President Ferdinand ‘Bongbong’ Marcos Jr. nga ipaidalom sa state of emergency ang bilog nga probinsya sang Negros Oriental kasunod sang pagpang-atake kag pagpatay kay former Gov. Roel Degamo sang Sabado sang aga.
Indi lang hitmen ang kinahanglan manabat suno kay Senator Marcos kundi mangin ang mastermind kag tanan nga kahimbon sa krimen.
Nagpanawagan man ini nga dapat i-lockdown ang pila ka areas sa Negros Oriental partikular na sa Bayawan City subong nga may mga suspek pa gihapon nga at large.
“Nananawagan ako na ideklara na sa lalong madaling panahon ang state of emergency sa entero probinsya ng Negros Oriental. Kailangan matigil at mahuli itong mga ito hindi lamang ‘yung mga hitmen or ‘yung pumatay kundi ‘yung mga mastermind, mga paymaster nila, at sinuman ang nag-conspire para mangyari ito,” pahayag sang senador.
Nahibaluan nga magkaupod sanday Senator Imee kag Governor Degamo sang una sa Governors League sang gobernador pa lamang si Marcos sa Ilocos Norte.
Mangin ang asawa ni Governor Degamo nga si Pamplona Mayor Janice Degamo ang naga-ugyon man sa panawagan ni Senator Marcos.
Suno sa alkalde, mas maayo gid nga may state of emergency samtang nga nagapadayon ang hot pursuit operation.
Magluwas kay Marcos, lakip sa nagbisita sa una nga adlaw sang haya sang gobernador sa Dumaguete City kahapon amo sanday House Speaker Martin Romualdez, kag Interior Secretary Benjamin Abalos Jr., Philippine National Police Chief Gen. Rodolfo Azurin Jr., kag Armed Forces of the Philippines Chief of Staff Andres Centino. ##
