ILOILO CITY- Gina-review na sang Department of Trade and Industry Region 6 ang ipatuman nga prize freeze sa nagkalain-lain nga probinsya sa Western Visayas.
Kasunod ini sang deklarasyon sang state of calamity sa bug-os nga rehiyon kun sa diin ipatuman ang automatic nga price control sang basic necessities.
Sa interview sang Bombo Radyo kay Judith Degala, Assistant Regional Director sang Department of Trade and Industry, iya ginpahayag nga sang Oktubre 30 pa lang, gin-check na nila ang supply sang basic necessities sa mga merkado kag ginsigurado nga wala na sang paghulag sang presyo.
Sa idalom sang Republic Act No. 7581, ukon ang Price Act, ang presyo sang basic necessities ang automatically frozen sa ila prevailing prices sa sulod sang 60 ka adlaw sa tion nga gindeklarar ang State of Calamity sa isa ka area.
Ang basic necessities amo ang mga produkto kaangay sang canned fish, instant noodles, bottled water, bread, processed milk, coffee, candles, laundry soap, detergent, kag asin.
May kaangtanan naman sa sitwasyon sang supplies sang basic necessities sa Antique, ginpahayag ni Degala nga nagapakig-angot na sila sa Office of Civil Defense para sa pag-transport sang amo nga mga produkto pinaagi sa sea vessel.
Nahibaluan nga imposible subong ang land travel sang mga dalagko nga trucks nga nagakarga sang nasambit nga mga produkto pakadto sa Antique kasunod sang pagkaguba sang pila ka mga taytay.
Ginpasalig naman ni Degala nga bastante pa ang suplay sang basic necessities sa Antique.
