Pormal na nga nagpanaog sa trono ang 83-anyos nga si Queen Margrethe II matapos ang 52 ka tuig nga pagginahum bilang reyna sang Denmark, isa sa pinakadumaan nga monarkiya sa bilog nga kalibutan.
Si Queen Margrethe II amo ang labing-una nga Danish monarch sa halos 900 ka tuig nga boluntaryo nga nagbiya sa iya trono kun sa diin ang ginalantaw nga rason amo ang major surgery sini sa iya nga likod sang nagligad nga Pebrero.
Nagbulos sa posisyon sang iya nga iloy si King Frederik X, 55.
Suno sa Christiansborg Palace, nangin pormal ang succession paagi sa pagpirma sang reyna sang deklarasyon sang iya nga abdication kadungan sang meeting sang Council of State sa parliament.
Wala sang koronasyon nga ginapatigayon sa Denmark kaangay sa nasaksihan sa Britanya kag sa pila ka royal houses, gani isa ka oras pagkatapos sang pirmahanay, gindeklarar na ni Prime Minister Mette Frederiksen ang bag-o nga hari sa balkonahe sang parliament kag naghatag naman si King Frederik X sang malip-ot nga speech sa atubang sang libu-libo nga mga tawo sa kapital sang Denmark nga Copenhagen.
Nagpungko ang bag-o nga hari kag reyna sa tion nga may daku nga suporta ang publiko sa monarkiya sang Denmark.
Sandig sa pinakaulihi nga survey sang gin-anunsyo ni Queen Margrethe II ang iya paghalin sa trono, nakasaad nga 82% sang Danes ang nagalaum nga mangin maayo mga hari si Frederik samtang 86% naman ang nagapati nga mangin maayo man nga reyna ang iya asawa nga si Mary nga isa ka Australian.#
(Photo: CBC)
