Nagalaum si Department of Environment and Natural Resources (DENR) regional director Atty. Ramar Niel Pascua nga mapadayon sang bag-o nga administrasyon ang Boracay Inter-Agency Task Force (BIATF) agud nga mapabilin man ang katahum sang isa sa pinaka-popular nga isla sa Western Visayas.
Apat ka tuig man ang ginlawig sang pagbaka-baka agud nga ma-improve ang Boracay Island antes nagpahayag ang DENR nga natapos na ang rehabilitation and management sa amo nga world-famous beach.
Una na nga ginpahayag sang DENR Central Office nga ang supervision sa area ang ginsaylo na halin sa Boracay Inter-Agency Task Force (BIATF) padulong sa local government unit.
Sa interview sang Bombo Radyo kay Pascua, iya ginpahayag nga daku ang nabulig sang amo nga task force bangud lakip diri ang pwersa sang DENR, Department of Tourism, kag mangin sang supervision sang Department of the Interior and Local Government (DILG).
Kahapon, Hunyo 23, pormal nga ginlunsar sang DENR Region VI ang book cover sang Boracay Coffee Tablebook nga “Boracay: A Paradise Reborn.”
Diri ginbutang ang nawong sang Boracay Island antes kag pagkatapos sang rehabilitasyon.
