ILOILO CITY – Ginpanginwala sang Department of Education ang alegasyon nga gina-profile ang mga myembro sang Alliance of Concerned Teachers.
Sang damlag lang, ang mga regional directors kag school division superintendents ang ginpasumiter sang pangalan sang mga manunudlo nga may kaangtanan sa amo nga grupo nga nagagamit sang Automatic Payroll Deduction System base sa isa ka memorandum nga naglapta sa internet.
Sa ginpagwa nga statement sang Department of Education, ang alegasyon nga ang memorandum ang para sa pag-profile sang mga myembro sang Alliance of Concerned Teachers Union nga kabahin sang anti-insurgency campaign sang gobyerno ang wala sang kamatuoran.
Pahayag dugang sang ahensya, ang request ang bukas sa publiko nga nagapamatuod nga wala ini nagatuyo nga mag-target sa mga myembro sang union, baliskad sa ginapahayag sang grupo.
Gin-athag man sang ahensya nga may yara man sang request para sa listahan sang mga myembro sang iban nga unyon, organisasyon, kag asosasyon sang teaching kag non-teaching personnel nga naga-avail sang Automatic Payroll Deduction System.
Katuyu-an sini nga ma-centralize, ma-update kag mapanami pa ang Human Resource Systems sang ahensya.
Kung matandaan, nagpanawagan si House Deputy Minority Leader kag ACT Teachers party-list Representative France Castro nga untaton na ang gina-alegar profiling operations batuk sa grupo kag sa mga myembro sini.
Nag-file sang House Resolution 1095 ang Makabayan bloc nga nagakondenar sa amo nga profiling operations kag ang pagsapubliko sa pagproseso sang personal information kag sensitive personal information sang mga myembro nga nagalapas sa 1987 Constitution kag Republic Act 10173 ukon ang Data Privacy Act.
Nagpanawagan man ini sa Marcos administration, partikular na kay Vice President kag Education Secretary Sara Duterte kag sa National Task Force to End Local Communist Armed Conflict nga untatan na ang ginapahayag profiling sang mga unions kag activists, kag subong man ang red tagging.
Si Duterte ang co-vice chairperson man sang nasambit nga task force.
