ILOILO CITY- Gina-finalize sang Department of Education (DEPED) ang assessment sa ginpatigayon nga pag-review sang K to 12 program.
Suno kay DEPED Undersecretary Epimaco Densing III, posible nga sa pinakamadali nga panahon, ipagwa na sang DEPED ang proposal para sa mga revisions sang amo nga programa.
Ginpahayag ni Densing nga sadto pa, ginmando na sang ahensya ang review sang Kinder to Grade 10 program antes pa man ang pagsugod sang administrasyon ni President Ferdinand Marcos Jr.
Si Vice President kag DEPED Secretary Sara Duterte ang nagmando man sang review sang Grades 11 to 12.
Base sa ulihi nga Pulse Asia survey, 44 percent sang mga Filipino ang indi satisfied sa K-12 system.
Una na ginpahayag ni Densing nga mas maayo nga itudlo ang English humalin sa Kindergarten sa baylo nga mother tongue nga amo ang mandated sa idalom sang current curriculum.
Dugang niya, kinahanglan man nga hanason ang mga manunudlo sang malawig-binulan tubtob tinuig, sa baylo nga hatagan lang sa pila ka semana nga seminar.
