Nagaplano ang Department of Education (DepEd) nga pabaskugon pa ang mga programa sa ahensya agud nga ma-address ang problema sa mental health sang mga estudyante kag agud nga mapahugot pa ang mga tikang para sa seguridad.
Kasunod ini sang nagkalain-lain nga reports sang pag-ilinaway sa sulod mismo sang eskwelahan nga ginpahayag may kaangtanan sa mental health problems.
Suno kay DepEd spokesperson Michael Poa, nagmandu na si Vice President kag Education Secretary Sara Duterte sa regional kag schools division offices nga magpakig-angot sa local police agud matumod ang mga eskwelahan nga nagakinahanglan sang spot inspections sang mga hinganiban nga dala sang mga personnel kag mga estudyante.
Antes sini nga lihok, may isa ka 13-anyos nga bata nga gin-buno patay sang iya classmate sa Culiat High School sa Quezon City sini lang nga Enero.
Sang nagligad lang nga semana, isa man ka estudyante ang aksidente nga nakatiro sang iya kaugalingon gamit ang pusil sang iya amay nga iya gindala sa sulod sang eskwelahan sa San Jose del Monte, Bulacan.
Magluwas pa ini sa mga nagakatabo nga rambol mangin sa guwa sang eskwelahan– babayi man ukon lalaki — kun sa diin masami involved ang mga menor de edad. ##
