ILOILO CITY – Nagapadayon ang pagpakig-istorya sang Department of Information and Communications Technology sa mga telecommunications firms may kaangtanan sa pagpa-untat sang pila ka mga serbisyo sang Subscriber Identity Module sa tion sang 90-day extension sang registration.
Ini agud nga ma-eksperyensyahan sang mga subscribers ang konsekwensya sang indi pagparehistro sang ila nga numero.
Suno kay Secretary Ivan John Uy, may yara sang pagsaka sang numero sang nagparehistro pila ka adlaw antes ang orihinal nga deadline nga ginapatihan niya nga bangud sang bad habit sang mga Pilipino nga indi maghulag kun wala pa ang deadline.
Ginpahayag sang natungdan nga sa sulod sang registration extension, nagaplano ang ahensya nga amat-amaton ang pag-limit sa access sa social media accounts ukon ang pag-deactivate sang call or text services.
Gin-athag sang natungdan nga indi pag-i-shut down ang Facebook kag Tiktok kundi, limitahan lamang ang access sa value-added services.
Gina-istoryahan man ang posibilidad nga paghatag sang incentives sa mga subscribers nga magaparehistro sang ila nga SIM.
Ang registration ang magatakup na kuntani subong nga adlaw, Abril 26.
As of the latest, may yara na sang ginabanta 82 million registrants nga ginalakipan sang 49.31% sang total users sang major telco players.
Ginpaathag ni Uy nga ginhatagan sila ni President Ferdinand Marcos Jr. sang isa gid lamang ka tsansa agud nga palawigon ang registration period.
Gin-enganyo man niya ang publiko nga magparehistro na sa ginhatag nga 90-day period.
Ginalauman nga magdangat sa 15 tubtob 18 million ang magaparehistro antes ang July 25.
