ILOILO CITY – Nagpanawagan ang Department of the Interior and Local Government (DILG) sa mga Local Government Units (LGU) nga magsunod sa version 2.0 ukon ikaduha nga hugnat sang road clearing operations.
Ini ang kasunod sang ginpagwa nga Memorandum Circular 2020-27 ni Interior Secretary Eduardo Año sa diin ginamando ang reclamation sang inner kag tertiary roads agud gamiton sang publiko.
Sa interview sang Bombo Radyo kay Atty. Cedric Jaranilla, legal officer sang DILG Region 6, iya ginpahayag nga ginhatagan lang sang central office sang 75 ka adlaw ang mga LGUs agud ipatuman ang clearing operations.
Lakip sa ginmandu sang memorandum amo ang pagpangkakas sang mga nagasablag nga kahoy, mga pribado nga istraktura, mga salakyan nga naga-park sang iligal, kag mga ambulant vendors.
Gin-athag man ni Jaranilla nga nagakadapat nga hatagan man sang relocation area kag alternatibo nga palangabuhian ang mga apektado nga residente.
Suno kay Jaranilla, ang mga opisyal sang barangay ang nagakadapat nga magpamuno sa operasyon sa bulig man sang LGUs.
Ginpahayag ni Jaranilla nga sa tion nga magtinamad ang mga barangay officials, ang mga local chief executives ang nagakadapat nga magpatuman sang sanction.
Magapatunga naman ang DILG sa tion nga may matabo nga abuse of authority sa bahin sang local chief executives.
SA MGA NON-COMPLIANT.
Samtang, mahimo naman nga magpangatubang sang kaso ang mga opisyal sang barangay nga indi magsunod sa ikaduha nga hugnat sang clearing operations.
Suno kay Jaranilla, sa Pilipinas, may 97 na ka mga municipal kag city mayors nga nagapangatubang sang kaso administratibo bangud sa non-compliance ukon sa indi pagsunod sa nasambit nga memorandum.
Sa Manila suno kay Jaranilla, may 10 na ka mga alkalde nga ginpasakaan sang kaso sang Office of the Ombudsman.
Diri naman sa Western Visayas, ginpahayag sang natungdan nga nakapasa naman sila sang mga verified complaints ukon reklamo kag ginpadala na sa central office.
Apang sa subong wala pa sang update kun bala magapasaka sang kaso base sa ginpasa nga report.
Nagpangabay man si Jaranilla sang suporta sa publiko nga magsunod sa clearing operations santo sa layi.
