Ginkumpirma sang Department of the Interior and Local Government nga nagdangat na sa halos 3,000 ka mga barangay officials ang ginreklamo sa ila talatapan bangud sa paglapas sa pagsulundan sang enhanced community quarantine.
Suno kay Department of the Interior and Local Government Undersecretary for Barangay Affairs Martin Diño, pila sa mga barangay officials ang may kaangtanan sa pa sa mga ilegal nga aktibidad kag anomaliya sa proseso sang pagpanagtag sang ayuda.
Dugang sang natungdan, posible nga mas magdamo pa ang reklamo nga ila mabaton samtang padayon nga ginapaidalom sa enhanced community quarantine ang pila ka mga barangay sa nagkalain-lain nga bahin sang pungsod nga ginapaagi sa nagkalain-lain man nga pamaagi kaangay nalang sang direkta nga pagtawag sa ila kag pagpadala sang mensahe sa social media.
Nahibaluan nga una na nga ginpahayag ni Presidente Rodrigo Duterte nga magahatag sya sang padya sa sinuman nga makapalab-ot sa ila sa anuman nga anomaliya sa diin may kaangtanan ang ila mga Local Government Unit ukon barangay officials.
