Nagdugang pa ang lista sang ahensya sang gobyerno nga nagpaguwa sang pahayag bilang pagpamatok sa tuyo nga i-separar ang Mindanao sa Pilipinas.
Wala sang ginmensyonar nga pangalan kun sin-o ang sa likod sini nga plano, apang ini nga mga paandam ang gin-isyu kasunod sang panawagan ni anay President Rodrigo Duterte nga buhion ang kampanya para sa Mindanao independence kun sa diin suno pa sa anay presidente, nagapangtipon na sang pirma ang iya kaalyado nga si Davao del Norte 1st District Rep. Pantaleon Alvarez.
Isa sa nagapamatok diri amo si Defense Secretary Gilberto Teodoro, Jr., isa man ka kilala nga kaalyado ni Duterte.
Suno kay Teodoro, mandato sang Department of National Defense nga pangapinan ang soberanya sang estado kag ang integridad sang national territory nga amo ang nakabutang sa Konstitusyon.
Ginpahayag sini nga tumanon nila ini nga mandato — sa external man ukon internal nga mga bagay.
“The mandate of the Department of National Defense is to secure the sovereignty of the State and integrity of the national territory as enshrined in the Constitution. We will strictly enforce this mandate whether externally or internally,” pahayag sang tiglikom.
Sa separado nga statement, nagpahayag naman ang Department of Justice (DOJ) nga hugot sini nga ginabalabagan ang panawagan nga i-bulag ang Mindanao sa Pilipinas.
Bilang principal law agency sang executive branch, ginpahayag sang ahensya nga ang secession ang naga-kontra sa prinsipyo sang democratic society nga nakasaad sa Konstitusyon.
Nagpanawagan man ini sa mga Pilipino nga ibasura ang kaangay nga “secessionist ideologies.”
“As the principal law agency of the Executive branch, the DOJ remains committed to protecting our sovereignty and upholding the sanctity of the highest law of the land. Our nation’s strength lies in unity, and we call upon all Filipinos to reject secessionist ideologies and work together for a strong, united, and undivided Bagong Pilipinas,” statement sang ahensya.
Antes ang DND kag DOJ, nag-isyu man sang paandam sanday National Security Adviser (NSA) Eduardo Año kag Presidential Peace Adviser Carlito Galvez Jr. kasunod sang kontrobersyal nga proposal sang anay presidente.
Sanday Año kag Galvez ang pareho nga nagpungko anay nga mga chief sang Armed Forces of the Philippines sa idalom sang Duterte administration.
Ang bahin sang Department of the Interior and Local Government (DILG) ang nagpaguwa man sang pahayag sang nagligad nga semana nga nagpaandam batok sa sini nga plano nga ila ginlaragway nga mga “secessionist moves”.#
