Ginsiguro ni Justice Secretary Fredderick Vida nga indi sila magpauli sa Pilipinas nga wala sang dala halin sa ila byahe sa Czech Republic.
Subong nga adlaw, natalana ang pagpakigsapol nanday Vida sa Czech authorities agud nga ma-athag ang status ni former congressman Elizaldy “Zaldy” Co kag iduso ang posible nga mga lihok agud madala-pabalik sa Pilipinas ang anay kongresista.
Suno kay Vida nga yara mismo sa Prague, i-validate nila ang tanan nga impormasyon nga nagagwa kag diskusyunan ang legal options nga available.
Pahayag pa sini, nakatipon na sila sang intel halin sa ila inisyal nga pagpakig-angot sa Prague apang nagbalibad anay ini nga magpatpat sang detalye samtang wala pa ang validation.
Pananglitan indi man nila mabalik subong sa Pilipinas si Co, may resulta man gihapon ang ila misyon suno kay Vida.
Nag-abot naman sa Prague ang team halin sa Philippine Center on Transnational Crime nga nagadala sang dugang nga mga dokumento agud nga kumpletuhon ang submission sang Pilipinas sa Interpol sa Lyon, France bilang suporta sa red notice request batok kay Co.
Wala naman naghatag si Vida sang timeline kun san-o magguwa ang red notice bangud sang internal procedures sang Interpol.
Una na nga ginpahayag sang Justice Secretary nga wala sang garantiya nga yara pa sa amo nga European country si Co nga amo ang isa sa pinakadaku nga personalidad nga naangot sa flood control scandal.#
