Nagdugang ang actor nga si Dominic Roque sa lista sang showbiz personalities nga nagpasaka sang cyber libel complaint batok sa columnist kag online show host nga si Cristy Fermin.
Gin-file ang reklamo sa Office of the City Prosecutor sa Pasig City bangud sa ginpahayag nga “malicious statements and innuendos” ni Fermin sa iya nga show nga “Showbiz Now Na.”
Antes sini nga tikang ni Dominic, ang iya ex-fiancée nga si Bea Alonzo ang nagpasaka man sang cyber libel cases batok kay Fermin, showbiz columnist kag host Ogie Diaz, kag ila kaupdanan.
Matandaan nga sang Pebrero, sa kasagsagan sang breakup nanday Dominic kag Bea, nagpaguwa sang statement ang legal team sang actor nga nagakondena sang “malicious and defamatory public statements” ni Fermin sa isyu. Kabahin diri ang alegasyon nga may benefactor si Dominic nga isa ka pulitiko kag ang amo nga opisyal amo ang tag-iya sang condominium unit kun sa diin ini naga-istar.
Una man nga ginpahayag nga nag-akto si Fermon nga guwa na sa boundary sang protected free speech kag ginhungod na sini ang ginpang-waragwag agud nga gub-on ang integridad sang actor kag iban pa nga personalidad nga involved.
Sang Mayo 10, ang celebrity couple nga sanday Sharon Cuneta kag former Sen. Francis “Kiko” Pangilinan ang nagpasaka sang amo man nga panumbungon batok kay Fermin.
