ILOILO CITY- Ginkalipay sang Iloilo Science and Technology University (ISAT-U) nga ginsaligan sila sang Department of Science and Technology-Philippines Textile Research Institute (DOST-PTRI) bangud sa ila ginturn-over ang Regional Yarn Production and Innovation Center (RYPIC).
Ang RYPIC sa ISAT-U Miagao Campus, amo ang pinaka-una nga gintukod sa guwa sang Metro Manila.
Sa interview sang Bombo Radyo kay Dr. Raul F. Muyong, Presidente sang ISAT-U, dako ang mabulig sang nasambit nga pasilidad sa unibersidad sa pag-improve sang instruction, research and extension.
Suno kay Muyong, makabulig man ang RYPIC sa mga pumuluyo ilabi na sa mga weavers, abaca kag cotton farmers.
Pahayag ni Dr. Muyong, wala nagpangduha-duha ang ISAT-U nga batunon ang nasambit nga proyekto bangud ang Miagao ang kilala man sa ila nga ‘weaving industry’ sa diin may mga manug hablon na nga makabulig sa RYPIC.
Ang ‘weaving industry’ ang kabahin na sa pagpangabuhi sang mga tawo sa Miagao.
Pahayag pa sang natungdan, ginaduso subong sang ISAT-U nga magdugang sang kurso nga Bachelor of Textile Technology agud nga makahatag sang dugang nga manpower sa Regional Yarn Production and Innovation Center.
Magluwas sa ginturn-over nga RYPIC, ginlunsyar man ang Unified Movement in Western Visayas to Accelerate Start-Up and Spin-Off Development (UMWAD).
