ILOILO CITY – Ginpasakaan na sang kaso nga pagpamahog sa presidente ang isa ka lalaki nga nagbunggo sa security barriers malapit sa White House.
Suno sa United Stated Park Police, posible nga ginhungod ang insidente.
Sa imbestigasyon sang mga otoridad, may nakita nga Nazi swastika flag sa sulod sang truck nga nagbunggo sa barriers sa Lafayette Square, isa ka public area nga malapit lamang sa White House compound.
Ang driver nga na-identify nga si Sai Varshith Kandula, 19, sang Chesterfield, Missouri, ang nagapangatubang sang madamo nga kaso lakip na ang tuyo nga pagpatay, pag-kidnap kag pagtuga sang piligro sa presidente, bise presidente ukon sa ila mga pamilya.
Napreso na ang amo nga lalaki ka pasakaan man sang kaso nga assault gamit ang delikado nga hinganiban, trespassing, pagguba sang federal property kag reckless operation sang salakyan.
Sa sulod sang pila ka dekada, ang Lafayette Square ang nangin lugar na sang political protests kag free-speech events.
Sang Mayo 2020, ginbutangan sang perimeter fence ang lugar matapos ang Black Lives Matter protests.
Ang kudal ang ginkuha apang ang mga barriers nga naga-block sang traffic sa side streets ang nagapabilin.
