Mapati ka man bala kun naga-chat sa imo si Elon Musk?
Isa ka 80-anyos nga babaye nga nagpadala sang P9-million sa iya “nobyo” nga una nagpakilala sa iya nga si Elon Musk, ang businessman, industrialist, kag former public official nga amo ang chief executive officer kag largest shareholder sang Tesla kag SpaceX.
Sandig sa Bureau of Customs (BOC), ini nga tigulang isa lamang sa halos 700 ka mga Pinoy nga biktima sang love scams.
Suno kay Customs Commissioner Ariel Nepomuceno, nagabaton ang ila talatapan sang masobra 70 ka reklamo kada bulan halin Enero tubtob Septyembre may kaangtanan sa amo nga klase sang pagpanunto.
Ginhalimbawa ni Nepomuceno nga nakita niya ang mga deposit slip nga nagabalor sa kabug-usan nga P9-million nga ginpadala sang tigulang nga babaye sa lalaki nga naggamit sang pangalan ni Musk.
Suno sa opisyal, mga matuod nga tawo ang yara sa likod sang mga peke nga online relationship.
Nagapakig-angot sila sa ila mga biktima kag nagagamit sang mga litrato agud makuha ang pagsalig sang mga ini.
“The boyfriends are not artificial intelligence. They are real people that they could talk to and they are really handsome,” suno kay Nepomuceno.
Sa pila ka kaso, nagapadala ang mga scammer nga yara sa iban nga pungsod sang magagmay nga regalo nga nagabalor sang P1,000, antes magpangayo sang 1,000 dollars nga ila ihambal nga para sa buwis kag iban pa nga balayran sang mga ginpadala nga malahalon nga alahas.
Pahayag sini, may pila man ka biktima nga nagabasol pa sa BOC kag nagapangayo sang refund bangud nagapati sila nga sa ahensya napadulong ang ila kuwarta.
Apang, ginpahayag ni Nepomuceno nga mabudlay na mabawi ang kuwarta bangud masami nga yara sa iban nga pungsod ang mga scammer.
Nagpaandam ang opisyal sa publiko nga mag-aligmat kun ang bag-o pa lamang nga nakilala sa internet nga nagapakilala nga nobyo ukon nobya nagapangayo gilayon sang kuwarta bangud posible nga pagpanunto lamang ini.#
