Nagatunog pa ang panawagan sang otoridad kay suspended Bureau of Corrections director general Gerald Bantag nga magsungka matapos nga ginpasakaan na sang murder complaint kasunod sang kamatayon ni Percival “Percy Lapid” Mabasa kag sang ginaalegar middleman sa kaso.
Gintumod sang otoridad nga may tuyo si Bantag nga patyon si Lapid bangud sang lakip siya anay sa mga nakomentaryuhan sang amo nga brodkaster.
Wala pa sang arrest warrant nga gin-isyu batok kay Bantag kag libre pa ini subong nga makalibot kun sa diin sini luyag apang hugot ang pag-monitor nga ginahimo sang National Bureau of Investigation.
Si Bantag ang nangin kabahin sang Philippine National Police Academy Kaagapay class of 1996 kag nag-serbe nga warden sang city jails sang Valenzuela, Navotas, Malabon, Manila, kag Parañaque.
Antes nangin chief sang Bureau of Corrections sang 2019, nangin regional director siya sang Bureau of Jail Management and Penology sa Mimaropa region.
Antes pa man ang Lapid Killing nga kaso, may yara na sang kontrobersyal nga mga isyu nga nagapalibot sa amo nga opisyal kag ini amo ang mga masunod:
Sang Agusto 2007, ginpasakaan sang kaso si Bantag bangud sang attempted murder sa isa ka teenager sa Caloocan City, apang nagpanginwala ini sa involvement.
Sang Enero 2014, gin-charge sang Malabon City prosecutor’s office si Bantag sang estafa kag illegal discharge sang armas luthang matapos ginpahayag nga wala ini nagbayad sang nag-inom sa isa ka restaurant sa amo nga syudad kag ginpahayag nga gintiro sini ang pader sa amo nga establisyemento.
Sang siya ang warden sang Parañaque City jail sang Agusto 2016, may yara sang naglupok nga granada nga nagpatay sang 10 ka “high-profile” inmates.
Siya ang gin-akusaran nga nagplano sang explosion agud mapatay ang inmates apang acquitted siya sa amo nga kaso sang Enero 2020 bangud sa kakulang sang ebidensya.
Ginsaylo siya sa Manila City Jail sang Oktubre 2016 apang nag-protesta ang inmates.
May ginpatigayon nga noise barrage bangud sang desisyon nga i-segregate ang mga preso nga may illegal drug-related cases. Sang amo nga tion, 35 ka inmates ang napilasan.
Sang Septyembre 2019, gin-appoint siya ni anay president Rodrigo Duterte bilang Chief sang Bureau of Corrections.
Bilang BuCor chief, ginpangunahan ni Bantag ang pag-demolish sang shanties nga yara sa sulod sang New Bilibid Prison nga amo ang gingamit agud nga decongest ang tuman ka gutok nga pasilidad.
Gindeklarar man siya nga persona non grata sa City of Muntinlupa sang November 2021 bangud sa illegal nga pagpatindog sang pader sa palibot sang Bilibid, kag amo man ang pagpaguba kag pagpahalin sa informal settlers sa compound.
Sa subong, napaidalom siya sa preventive suspension kasunod sang mandu ni President Ferdinand Marcos Jr. agud masiguro nga patas ang imbestigasyon sa kamatayon ni Lapid.
Matapos nga ginsuspend, matandaan nga naglaslas na si Bantag kag ginbasol sa Marcos administration ang sala sa imbestigasyon sa kaso sa pagpatay sa brodkaster.
Ginpahayag sini nga indi siya magpasugot nga mapreso kag mas piliion na lang niya nga mapatay sangsa ibutang sa presuhan.
Matandaan nga sang Oktubre, una na nga nagpahayag si Bantag nga wala siya sang kahilabtanan sa kaso bangud suno sa iya, wala man siya sang maganar kun patyon si Lapid.
Ginpahayag man sini anay nga kadamo sang iya nangin kritiko sa media sa iya tion sa Bucor apang wala sang bisan isa nga napatay.
