Target sang Department of Agriculture nga mas padamuon pa ang Kadiwa ng Pangulo (KNP) stores sa bilog nga pungsod.
Halin sa existing 108 stores, plano sang ahensya nga mahimo ini nga 179 antes magtakop ang tuig para nga mas mapalapit sa mga pumuluyo ang mas barato nga produkto sa agrikultura.
Suno kay Agriculture Assistant Secretary Genevieve Guevarra, ipatukod ang dugang nga sites sa dalagku nga mga syudad sa guwa sang National Capital Region (NCR).
Kabahin ini sang masangkad nga plano nga 1,500 KNP sites ang maga-operate sa bilog nga pungsod antes magtakop ang Marcos administration sa 2028.
Nahibaluan nga may 41 existing Kadiwa centers sa pungsod samtang ang National Irrigation Administration ang naga-operate naman sang 67 centers gani nga 108 ang kabug-usan nga bukas.
Gin-athag man sang ahensya nga bisan 20-30% nga mas barato ang mga produkto sa Kadiwa sites ipaanggid sa mga baligya sa mercado, wala man ini naga-compete sa public markets.
Paagi ini suno sa DA sa pagpaanggid sang presyo kag maayo man nga paagi sa check and balance sa retail prices sa public markets.
