Gin-release na sang Department of Budget and Management (DBM) ang P11.5 billion para sa benepisyo sang eligible healthcare kag non-healthcare workers.
Ini ang magluwas pa sa P1.04 billion nga gin-release sang Budget department sang Oktubre 3 para sa special risk allowance sang 55,211 healthcare workers nga direkta nga nag-cater sa suspected kag confirmed COVID-19 patients halin sang Septyembre 2020 tubtub sa Hunyo 2021.
Ang bag-o lang gin-release nga P11.5 billion ang nakapain para sa health emergency allowance ukon ang one COVID-19 allowance sang 1,617,660 eligible healthcare kag non-healthcare workers.
Covered diri ang period nga January to June 2022.
Indi ini kaangay sa special risk allowance kun sa diin makakuha ang health worker sang fixed nga P5,000 monthly benefit sa iya pagtatap sa COVID-19 patients.
Ang amount sang health emergency allowance naga-depende sa risk of exposure sang frontliner sa virus:
P3,000 – para sa deployed sa ‘low-risk areas’
P6,000 – para sa deployed sa ‘medium-risk areas’
P9,000 – para sa deployed sa ‘high-risk areas’
Ihatag man ini nga allowance sa kada bulan sang serbisyo.
Suno sa Department of Health (DOH), gina-proseso na sang regional offices ang mga dokumento agud ma-disburse ang kabug-usan nga 12.5 billion funds nga nabaton.
Posible suno sa health department nga mahatag ini sa recipients sa masunod nga semana. ##
