ILOILO CITY- Duha na ka mga barangay sa San Miguel, Iloilo ang gin-classify nga ground zero matapos nga narecord ang positibo nga kaso sang African Swine Fever sa mga baboy.
Ini amo ang barangay San Jose kag Barangay 15 Poblacion.
Sa interview sang Bombo Radyo kay Mayor Marina Gorriceta, iya ginpahayag nga padayon ang ila pag-depopulate sa mga baboy nga positibo sa African Swine Fever sa sulod sang 1 kilometer radius gikan sa ground zero.
Suno kay Gorriceta, padayon man ang ila pagpaidalom sa test sa mga baboy nga sakop sang 1 kilometer radius kag kun magnegatibo sa virus ang baboy, ini ang mahimo nga sagudon gihapon sang tag-iya apang kinahanglan nga ipaidalom sa monitoring.
Sa subong, naglab-ot na sa lima ka hog raisers ang apektado sang pagpositibo sa African Swine Fever sang mga baboy.
Nahibaluan nga may yara sang batunon ang mga hog raisers nga cash assistance nga P10,000 halin sa provincial government, P10,000 halin sa Municipal Social Welfare and Development Office, kag may yara man sang magahalin sa Local Government Unit apang ginpahayag sang alkalde nga wala pa mahibaluan kun pila ang kantidad nga ihatag.
