Nagapabilin nga kritikal sa gihapon ang kondisyon sang duha ka mga estudyante nga nalakip sa 15 ka mga pilason sa nagluntad nga pagpangluthang sa sulod sang eskwelahan sa San Jose National High School, Tacloban City.
Ginkilala ang mga biktima nga amo sanday Joan Vinias, isa ka Grade 10 student nga gintiro sa ulo kag si Nathan Candelario, isa ka Grade 9 student nga naigo sang bala sa tiyan.
Suno sa iloy ni Joan nga si Rowena Eracho, malain ang pamatyag sang iya anak antes magsulod sa eskwelahan apang nagpamilit ini nga mag-eskwela.
Pag-abot sini sa ospital matapos nabatian ang natabo, nakit-an sini ang iya anak nga nagahamyangon na.
Samtang suno naman sa amay ni Nathan nga si Erwin, nagsulod ang bala sa idalum sang pusod sang iya anak kag nagguwa sa iya kilid nga bahin sang tiyan nga nagresulta sang tatlo ka igo, rason nga madugay ang pag-recover sini
Sa subong nagapabilin sa kustodiya sang kapulisan ang mga suspetsado nga naga-edad sang 14 kag 15 anyos kag padayon ang panawagan sang mga pamilya para sa hustisya.
Ginpasaka na sang Police Regional Office 8 ang tatlo ka counts sang murder, tatlo ka counts sang frustrated murder, kag multiple counts sang serious physical injuries batok sa 15-anyos nga suspek sa pagpangluthang sa sulod sang San Jose National High School sa Tacloban City.
Ang suspek ginakabig nga Child in Conflict with the Law (CICL).
Magapabilin naman sa kustodiya sang Department of Social Welfare and Development (DSWD) Regional Rehabilitation Center for Youth sa Tanauan, Leyte ang duha ka suspek.
Samtang, gina-imbestigahan naman ang isa ka babayi nga pulis nga tiya sang isa sa mga suspek matapos magamit ang pusil sini sa insidente.
Suno sa pulisya, naka-restrictive custody na ang opisyal kag ginkakas naman ini sa puwesto samtang nagapadayon ang administrative investigation.
Plano man sang mga awtoridad nga dal-on sa posible nga kasuhan ang mga ginikanan sang mga suspek.
