ILOILO – Padayon pa nga ginapangita sang mga otoridad ang durugista nga subject sa drug buy bust operation sang Provincial Drug Enforcement Unit (PDEU) sa Sitio Tuburan, Barangay Trapiche, Oton, Iloilo.
Ini amo si Mike Cantera, residente sang nasambit nga barangay.
Sa amo nga insidente, pilason ang isa ka pulis matapos ginluthang sang 12 gauge homemade shotgun sang pakaisa sang subject nga kaupod sini nga nagpalagyo.
Ang pulis amo si Police Corporal Gilbert Lingaya nga nagaserbe nga backup, residente sang Barangay Damires, New Lucena, Iloilo.
Sa interview sang Bombo Radyo kay Police Major Dadje De Lima, head sang PDEU, iya ginpahayag nga nagapadayon pa subong ang hot pursuit operation agud madakpan si Cantera kag pakaisa sini.
Suno kay De Lima, sang nagdeklarar sang buy bust ang police poseur buyer, gilayon nga nagpalupok sang armas ang pakaisa sang subject sa diin naigo si Lingaya.
Ginhingalitan naman ini ni Cantera agud makapalagyo.
Naglawig pa sang tatlo ka oras ang negosasyon sang mga otoridad sa pagdumdom nga nagapanago lang si Cantera kag pakaisa sini sa sulod sang balay.
Lakip sa mga nag-negosyar amo ang misis ni Cantera, Oton, Iloilo Mayor Mayor Sofronio Fusin, Jr., Punong Barangay Jeorge Mediodia kag si Iloilo Police Provincial Office Director Police Colonel Bayani Razalan.
Matapos sini, nagdesisyon ang mga pulis nga sudlon ang balay sang subject kag didto natukiban nga nagpalagyo na ini.
Nagpanawagan man si De Lima sa subject kag sa pakaisa sini nga magsungka na sa mga otoridad kag atubangon ang mga panumbungon.
