GUIMARAS– Nagpalab-ot sang reklamo ang isa ka empleyado sang food processing sa probinsya sang Guimaras matapos ginapahayag wala sila sa gihapon nakabalik sa trabaho, kag wala man nakabatun sang sa Small Business Wage Subsidy gikan sa Social Security System.
Sa interview sang Bombo Radyo kay Riemay Nepumuceno, iya ginpahayag nga 11 na siya katuig nga nagatrabaho sa Trappist Monastic Food Products sa Probinsya sang Guimaras kag subong nga yara na ang probinsya sa Modified General Community Quarantine, sa gihapon wala sila nakabalik sa trabaho,
Suno kay Nepumuceno, sila sa production ang wala pa nakabalik apang ang yara sa opisina ang nakabalik na sa pagtrabaho.
Ginpahayag man niya nga tubtob subong, pila sa ila ang wala sa gihapon nakabatun sang ayuda gikan sa SSS rason nga nagahingyo siya sa ila ginatrabahuhan nga kuntani ifollow-up sa SSS kun bala makabatun man sila sang ayuda.
Samtang nagsabat man ang pamunuan sang Trapist Monastic Food Products tuhoy sa ginpalab-ot nga reklamo sang ila empleyado.
Sa interview sang Bombo Radyo kay Geneveve Que, Human Resource Deparment Head sang amo nga kumpaniya, iya ginpahayag nga ginpaathag na nila sa ila mga empleyado ang tuhoy sa pagbalik sa trabaho.
Suno kay Que, bangud food products ang ila ginabaligya, tuman sila nga naapektuhan sang pandemya humalin sang nagsugod ang pagpatuman sang quarantine protocols.
Indi pa mahimo makabalik suno sa iya ang mga yara sa processing bangud wala pa subong sang orders sa ila, bangud ang ila negosyo ang nakadepende sa mga customers.
Pahayag pa niya, una na nila ginpabalik ang mga nagreklamo bangud may yara sang nag-order sang ila produkto, apang ginapasigurado niya nga sa tion nga may mga orders na sa ila, pabalikon nila ang mga yara sa processing.
Samtang sa bahin naman sang Small Business Wage Subsidy gikan sa Social Security System, padayun pa nila nga ginalab-ot ang amo nga ahensya agud mahibaluan ang estado sang application sang ila mga empleyado.
Suno kay Que, sang nagtawag sila sa SSS ginhambalan sila nga makig-angot sa Central Office sang ahensya, apang sang natawag siya sa pila ka numero sang natungdan ngaa ahensya sang gobyerno, kalabanan sa numero nga nahatag sa ila ang ‘wrong number’
Nagalaum naman ang natungdan nga kuntani,magapabilin nga positibo ang panan-awan sang ila tagsa ka empleyado sa pihak sang krisis.
