ILOILO CITY – Natalana na nga pirmahan ni Iloilo Governor Arthur Defensor subong nga adlaw ang Executive Order may kaangtanan sa pagpalawig sang Enhanced Community Quarantine sa probinsya sang Iloilo tubtob Abril 30.
Ini bangud man sa padayon nga pagsaka sang kaso sang Coronavirus Disease 2019 sa probinsya sang Iloilo sa diin may yara naman sang isa ka panibag-o nga kaso sang COVID-19 sa banwa sang Barotac Nuevo nga amo ang 25-anyos nga babayi.
Sa interview sang Bombo Radyo kay Defensor, iya ginpahayag nga pat-ud niya nga hugot na nga ginapatuman sang mga alkalde sa probinsya ang Enhanced Community Quarantine kag iban pa nga mga pagsulundan apang mas maayo kun mas matsekyar nga wala na sang madugang pa nga Persons Under Monitoring kag Persons Under Investigation.
Suno kay Defensor, ginbasehan man niya ang pagpalawig sang Enhanced Community Quarantine ang padayon man nga pagsaka sang numero sang Persons Under Monitoring kag Persons Under Investigation sa pila ka mga kabanhawanan sa probinsya.
