ILOILO – Pasakaan sang sampaw-sampaw nga kaso ni anay Iloilo Provincial Administrator kag blocktimer nga si Manuel ‘Boy’ Mejorada ang pinuno sang Provincial Special Operations Group (PSOG) nga nagdakop sa iya matapos ginserbehan sang warrant of arrest sa iya balay sa Parc Regency sa Balabag Pavia, Iloilo.
Si Mejorada ang may lima ka warrant of arrest sa diin may kaangtanan ini sa paglapas ni Mejorada sa Republic Act 10175 ukon Cybercrime Prevention Act of 2012 nga ginpasaka ni outgoing Iloilo Gov. Arthur Defensor Sr.
Sa interview sang Bombo Radyo Iloilo kay Mejorada, iya ginpahayag nga ginlapas sang PSOG ang iya tawhanon nga kinamatarong sa pagpanguna ni Police Major Jonathan Pinuela.
Suno kay Mejorada, wala ini ginbasahan sang iya Miranda Rights kag wala pa nagpakilala ang mga otoridad sang nagsulod sa iya balay.
Magluwas sini, ginpahayag ni Mejorada nga gintuyo pa ni Major Pinuela nga gabuton ang iya armas luthang.
Lakip sa mga kaso nga ipasaka ni Mejorada kay Major Pinuela amo ang tresspassing, grave threat kag kapaslawan nga basahon ang iya Miranda rights.
Matandaan nga una na nga gintawag ni Pinuela, nga arogante nga sahi sang tawo si Mejorada.
Ini ang may kaangtanan sa akusayson ni Mejorada nga wala ginsunod sang PSOG ang nagakaigo nga proseso sa pagdakop sa iya.
Suno kay Pinuela, ginbasahan niya sang miranda rights si Mejorada baliskad sa pahayag sang provincial administrator.
Nagapanindugan si Pinuela nga nag-agi sa standard procedure ang pagdakop sang PSOG kay Mejorada.
Wala man naggabot, nagpangtaya sang armas kag nagpamahog ang hepe.
