Ex-Rep. Manuel, manubo ang expectations sa SONA ni Marcos

Manubo ang ginapaabot ni former Kabataan Party-list Rep. Raoul Manuel sa masunod nga State of the Nation Address (SONA) ni President Ferdinand “Bongbong” Marcos Jr.

Sa interview sang Bombo Radyo kay Manuel nga amo man ang convenor sang Kahublagan Kontra Kurapsyon (KKK), iya ginpahayag nga bisan pa nga nagpanawagan sang una ang Presidente nga dapat mahuya man ang mga kurap nga opisyal sang gobyerno, wala ini suno sa iya makita sa paagi sang pagdumala sang administrasyon.

“Sa totoo lang, mababa na yung expectations natin, kasi last year sinabi ni Marcos Jr. na mahiya naman daw yung mga kurakot, pero parang siya yung hindi nahihiya,” suno sa anay kongresista. “Umabot na ang isang taon tapos nagging palpak naman pala.”

Ginpabutyag ni Manuel nga sa baylo nga may makita nga accountability, padayon gihapon nga wala sang kauswagan ang pagdumala bisan pa sa nagkalain-lain nga mga isyu nga gina-atubang sang gobyerno.

Ginmuno man sang kongresista ang suno sa iya kakulangan sang maayo nga resulta sang Independent Commission for Infrastructure (ICI).

Suno sa iya, nangin “performative” lamang ang amo nga komisyon kag wala sang maathag nga epekto sa pagsolbar sang mga problema sang pungsod partikular na sa eskandalo sa flood control.

Dugang pa niya, ang pag-appoint sa pila ka personalidad sa mga importante nga posisyon sa gobyerno ang mas nagapanubo pa gid suno sa iya sang pagsalig sang publiko sa administrasyon.

Bangud sini, nanawagan si Manuel sa Presidente nga pamati-an ang tingog sang ordinaryo nga mga Pilipino kag magpatuman sang mga konkreto nga tikang.

Sa Lunes, Hulyo 27, iga-deliver ni Marcos ang iya ika-lima nga SONA.#