Yara na sa paghinakop sang tag-iya sang fishing boat ang 13 ka mga crew members nga nakaluwas sa vessel collision incident sa kalalawran nga sakop sang Maracanao Island, Agutaya, Palawan.
Ang amo nga insidente ang natabo sang nagligad nga Sabado, Mayo 28, matapos nga ginapahayag ginbungguan sang cargo vessel nga MV Happy Hiro ang Filipino fishing vessel nga FB JOT-18.
20 ang sakay sang amo nga fishing boat, apang tubtub subong, missing ang pito ka mga manugpangisda.
Sa interview sang Bombo Radyo kay Coast Guard Lt. Martoni Saliendra, legal officer sang Philippine Coast Guard (PCG) – Western Visayas, iya ginpahayag nga taga-banwa sang Estancia, Iloilo ang tag-iya sang amo nga fishing boat.
Sa 13 nga nakaluwas, isa ang taga-Estancia, kag ang nabilin ang lunsay na residente sang Bantayan Islands, Cebu. Ang missing nga mga persona ang lunsay man tumandok sang Cebu.
Suno kay Saliendra, sa ginhimo nga imbestigasyon, natukiban nga may yara man sang mga violations nga na-commit ang fishing boat.
Nagbiya ini sa pantalan apisar nga wala sang PCG clearance — violation nga may multa nga P10,000.
Wala man sini nakumpleto ang Master Declaration of Safe Departure — katumbas sang multa nga P50,000.
Ginkumpirma man ni Saliendra nga gin-file na ang panumbungon batok sa apat ka mga opisyal sang MV Happy Hiro.
Ang complaint nga ginpasaka sa Antique Prosecutor’s Office amo ang reckless imprudence resulting in multiple homicide, multiple injuries, and damage to properties.
Ginpasaka ini batok kanday Captain Amir Meshay, isa ka Croatian national; Second Mate Bogdan George Antonie, isa ka Romanian national; kag Filipino officers nga sanday Tyrone Maquiling kag Mckinley Amante.
Ginapahayag man nga indi pagpahanugutan ang MV Happy Hiro nga magbiya sa pungsod samtang pending pa ang resulta sang imbestigasyon.
Sa inisyal nga imbestigasyon, nakasaad nga naka-angkorahe ang FB JOT-18 kag naka-encounter sang engine failure sang gulpi lang ini nga nabungguan sang MV Happy Hiro sang yara na malapit sa Maracanao Island.
