Ginkumpirma sang Iloilo International Airport subong nga gab-i nga na-delay ang isa ka flight nga pakadto kuntani sa Puerto Princesa City, Palawan bangud sa bomb joke.
Suno sa management, ang involved amo ang Cebu Pacific Air flight 5J4805.
Ginapahayag nga may isa ka pasahero nga naglahog kaangot sa bomba samtang nagasakay na ini sa eroplano.
Gilayon nga ginpapanaog ang tanan nga pasahero pabalik sa terminal.
Nagpatigayon man sang ma-id-id nga inspeksyon ang awtoridad kag sang ulihi, nakumpirma nga wala sang explosives ukon hazardous materials sa area.
“The passenger was escorted for documentation and offloaded from the flight, with appropriate coordination with airline authorities,” suno sa airport.
Ginpahandumdom sini sa publiko nga hugot nga ginadumilian ang bomb jokes sa idalom sang Presidential Decree No. 1727 (Bomb Joke/Threat Law). Ginaseryoso sang security and law enforcement authorities ang kada insidente nga naangot diri.
“Please refrain from making any jokes or comments that refer to bombs, explosives, or any instruments of violence while at the airport or on board any flight. Your compliance and cooperation will help us avoid any security or law enforcement actions that may delay flights and cause unnecessary inconvenience to all travelers,” dugang pa sa social media statement sang airport.#
