Ginganyat ni Department of National Defense (DND) Officer-In-Charge Carlito Galvez Jr. ang foreign defense ministers, officials, kag diplomats nga suportahan ang 2016 Permanent Court of Arbitration ruling kun sa diin ginbasura ang pag-claim sang China sa West Philippine Sea.
Sa International Institute for Strategic Studies Shangri-La Dialogue halin sang Hunyo 2-4, 2023 sa Singapore, gin-updan ni Galvez ang United Kingdom Secretary of State for Defense kag Canadian Minister of National Defense agud pangunahan ang diskusyon sa topiko nga “Building a Stable and Balanced Asia-Pacific.”
Ginplastar ni Galvez ang papel sang international law bilang “greatest equalizer” sa lain-lain nga estado.
Ini ang rason suno kay Galvez nga nagdangop ang Pilipinas sa compulsory dispute settlement mechanism sang United Nations Convention on the Law of the Sea (UNCLOS) kag sa The Hague Tribunal bangud sa isyu sa teritoryo sa China sa West Philippine Sea.
Suno sa DND, kun suportahan sang iban nga mga pungsod ang 2016 South China Sea Arbitration Award, matabo ang global order sa dagat kag ma-uphold ang prinsipyo sang international law.
Matandaan nga sang 2013, ginpasaka sang Pilipinas sa international arbitral tribunal sa The Hague ang reklamo sini batok sa China. Sang Hulyo 2016, nagdesisyon ang korte pabor sa Pilipinas kag ginbasura ang nine-dash claim sang China sa West Philippine Sea.
Apisar sini, wala ginsapak sang China ang panawagan sang Pilipinas nga magtuman sa ruling sang 2016 arbitration kag gintawag pa ang amo nga desisyon nga iligal kag indi valid. #
