ILOILO CITY- Nagpabutyag sang suporta ang Germany sa pagprotekta sa kinamatarung sang mga pumuluyong Pilipinhon kag amo man sa international-based order kadungan sang nagapadayon nga tensyon sa West Philippine Sea.
Sa joint press conference ni President Ferdinand Marcos Jr. sa Federal Chancellery sa Berlin, Germany, ginpahayag ni German Chancellor Olaf Scholz nga importante ang pagsakdag sa international law, partikular sa mga laye nga nagadumala sa international navigation kaangay sang United Nations Convention on the Law of the Sea (UNCLOS).
Sa bahin naman ni President Marcos, iya ginpahayag nga ang ginsulod na sang China ang economic zone sang Pilipinas kag samtang nga padayon nga nagapakatig- ang China kag sunod-sunod na ang pagpang-harass, mabudlay ini nga masolbar.
Gin-athag man ni Marcos nga wala gina-reject sang Pilipinas ang proposals sang China nga maresolba ang issues sa West Philippine Sea apang ginakwestiyon sang Pilipinas ang ginaduso sang China ten-dash-line map nga ginabasehan sini sang ila ginaangkon nga teritoryo kag wala ini ginakilala sang bisan ano nga pungsod kalakip na ang Pilipinas.
Gindugang man sang presidente nga padayunon sini ang paghatag balor sa Philippine Constitution kag pagprotekta sa kinamatarung sang pumuluyo kag sa soberanya sang Pilipinas.
