Duha ka mga opisyal ang nagdugang sa Gabinete ni President Ferdinand ‘Bongbong’ Marcos, Jr.
Ini amo sanday Gilberto “Gibo” Teodoro Jr. nga amo ang magapungko nga tiglikom sang Department of National Defense (DND); kag si Dr. Teodoro Herbosa nga amo naman ang magapungko nga tiglikom sang Department of Health (DOH).
Suno sa Malacañang, gin-appoint sanday Teodoro kag Herbosa bangud sang malawig nga eksperyensya kag manggaranon nga ihibalo sa ila tagsa ka patag.
GIBO TEODORO
Bilang pinuno anay sang DND, siya man ang nangin chairman sang National Disaster Coordinating Council.
Sa bahin ni Teodoro, ini ang iya pagbalik sa amo nga posisyon nga gin-uyatan man niya sang 2007 tubtub 2009 sa idalom sang administrasyon ni former President Gloria Macapagal-Arroyo.
Isa siya ka Bar topnotcher kag graduate sang Harvard University.
Nangin kongresista man siya sa first district sa Tarlac sa sulod sang tatlo ka termino, kag nagpadalagan sa pagka-presidente sang 2010 apang ginlutos sang iya pakaisa nga si late president Benigno Aquino III.
Nagpadalagan man ini sa pagka-senador sa idalom sang Uniteam sang 2022 apang wala nagdaog.
Bangud napierde sa 2022 elections, nangin eligible lamang siya nga makauyat sang posisyon sa Gabinete halin sang Mayo 10, 2023 ukon isa ka tuig matapos ang May 9 elections.
DR. TED HERBOSA
Sa pihak nga bahin, si Dr. Teodoro Herbosa naman ang naka-serbe bilang DOH undersecretary halin sang 2010 tubtub 2015.
Siya man anay ang regional director sa DOH-National Capital Region office.
Nangin special adviser man siya sa National Task Force Against COVID-19 sa kasagsagan sang Covid-19 pandemic.
Antes sang iya appointment, nangin professor man si Herbosa sa College of Medicine sa University of the Philippines Manila, kag nangin executive vice president sang UP System halin sang 2017 tubtub 2021.
Nahibaluan nga halos isa ka tuig man nga bakante ang posisyon sang DOH Secretary bangud wala sang gin-appoint si Marcos halin sang nagpungko ini sang Hunyo 2022.
Sang amo man nga bulan, ginrekomendar na sang Private Hospitals Association Philippines kag Philippine Medical Association nga si Herbosa ang himuon nga pinuno sang DOH. #
