Magatipon na liwat ang Gilas Pilipinas para sa panibag-o nga misyon nga lutuson ang New Zealand kag ang Hong Kong sa FIBA Asia Cup qualifiers.
Sa pagpanguna sa gihapon ni Coach Tim Cone, magahanas ang national team sa Inspire Sports Academy sa Laguna para sa preparasyon sa una nga duha ka hampang nga diri mismo sa patigayunon sa Pilipinas.
Sa Nobyembre 21, atubangon sang Gilas ang world no. 22 nga New Zealand nga may pareho nga 2-0 record.
Tatlo ka adlaw ang makaligad, may rematch ini sa Hong Kong nga may 0-2 record subong kag una naman nga gintambakan sang Gilas sang Pebrero sa skor nga 94-64.
Sa lista sang 15 players ni Cone, nalakip si AJ Edu nga naka-recover na subong matapos nga wala gid nakahampang sa first window sang FIBA Olympic Qualifying Tournament bangud sa injury.
Yara man ang former Ateneo big man nga si Ange Kouame nga maga-upod kay Justin Brownlee bilang naturalized player. Ini ang iya una nga pagbalik sa Gilas sa sulod sang duha ka tuig matapos ang katapusan sini nga hampang sa FIBA World Cup Asian Qualifiers sang 2022.
Pamilyar na ang iban nga nawong nga nabilin sa team nga ginpili ni Cone nga amo sanday PBA stars June Mar Fajardo, Scottie Thompson, Japeth Aguilar, Calvin Oftana, Chris Newsome, CJ Perez, kag Jamie Malonzo.
Magahatag-pwersa man sa team ang players halin sa Japan B. League nga sanday Edu, Dwight Ramos, kag Kai Sotto.
Halin naman sa Korean Basketball League, yara si Carl Tamayo; kag magabulig man ang UAAP stars nga sanday Kevin Quiambao kag Mason Amos sang La Salle.
Ini ang una nga hampang sang Gilas apat ka bulan matapos ang maragtason nga 89-80 nga upset batok sa World No. 6 nga Latvia sa FIBA Olympic Qualifying Tournament kag ginkabos sang duha gid lamang ka hampang para maka-qualify kuntani sa Paris Olympics.#
