Ginpaatubang sa hearing sang Senado sa Davao City ang mga residente nga nagsiling nga ginpapirma sila sang people’s initiative signature sheets kag may promisa nga hatagan sila sang ayuda ukon financial assistance, food packages kag iban pa nga mga benepisyo kabaylo sang isa ka bagay — ang ila nga pirma.
Ini ang nangin sentro sang padayon nga pagpangusisa sang Senate committee on electoral reform and people’s participation sa pagpanguna ni Sen. Imee Marcos kaangot sa ginaduso nga Charter change.
Yara sa guest list ang pangalan ni anay president Rodrigo Duterte apang wala man ini nagpakita sa hearing.
Halos apat ka oras ang ginlawig sang hearing kun sa diin present man sanday Senators Bong Go kag Ronald dela Rosa nga lunsay taga-Davao kag may yara man sang mga nagtambong nga local government officials.
May yara sang barangay kapitan nga nag-presentar sang folder nga nagaunod sang pangalan sang mga residente nga gusto magbawi sang ila pirma sang nareyalisar nga nabiktima man sila sang P4,000 nga gintanyag sa ila.
Pagkatapos sang hearing, nagpaandam ang mga senador sa People’s Initiative for Modernization and Reform Action (PIRMA) nga dapat man nila ipasa ang listahan sang ila donor sa P55 million nga amo ang gingasto para sa advertisements nga naga-promote sang people’s initiative.
Suno naman kay Senator Marcos, madamo pa kuntani ang gusto magpartisipar sa hearing apang limitado ang tyempo.
Ginhingyo sini sa barangay officials nga magpasa sang dugang nga ebidensya agud nga mapamatud-an ang kaso sang bribery kag misuse sang government funds.
Ginhingyo man sang senadora sa Kamara nga sa baylo nga isuspinder sang Kongreso ang people’s initiative sa pagduso sang Charter Change — mas nagakadapat nga ibasura na gid ini.
Nagpaguwa naman sang pahayag ang duha ka mataas nga opisyal sa Kamara kasunod sang hearing sang Senado sa Davao City kaangot sa people’s initiative.
Suno kanday Senior Deputy Speaker Aurelio Gonzales Jr. kag Deputy Speaker David Suarez, wala man sang napamatud-an ang hearings sang Senate committee on electoral reforms and people’s participation.
Pahayag ni Gonzales, indi matuod nga ang national government agencies kaangay sang Department of Social Welfare and Development ang gingamit agud nga suportahan ang people’s initiative.
“Kanina pa po ako nagmomonitor sa hearing, from two o’clock, hanggang ngayon nagmomonitor ako, pero narinig niyo naman po, wala naman pong pamimigay ng pera na nangyari,” suno sa mamalidha.
Kaangay man nga sentimyento ang ginbuy-an ni Deputy Speaker Suarez.
Usik lang ini sang tyempo suno sa iya kag kuntani, gingamit na lang ang tion agud buligan ang mga residente sa Davao nga apektado sang kalamidad.
Nagpanawagan man ini nga magtutok na lamang sa hearing sa Resolution of Both Houses No. 6 nga nakatalana na sa Lunes.
“My request to our senator friends, please just focus on Resolution of Both Houses (RBH) No. 6 because it [will] be the answer to the progress for the Philippines and I hope that on Monday, you will start working on it,” pahayag sini sa isa ka video message. #
(Photo: Senate of the Philippines)
