Nagaplano ang gobyerno nga maggasto sang P206.5 billion sa subsidiya kag ayuda nga amo ang ihatag sa vulnerable sectors sa masunod nga tuig samtang nga nagapadayon sa pagsaka ang presyo sang mga balaklon bangud sang global inflation.
Suno kay Office of the Press Secretary Officer-in-Charge Cheloy Garafil, lakip sa alokasyon amo ang cash transfers kag ang iban pa nga subsidy programs sang lain lain nga mga ahensya sang gobyerno.
Gin-cite man ni Garafil ang data gikan sa Department of Budget and Management.
Yara sa P165.40 billion ang magakadto sa Department of Social Welfare and Development para sa implementation sang nanuhay-tuhay nga social assistance programs, samtang P22.39 billion naman ang ipain para sa Medical Assistance to Indigent and Financially-Incapacitated Patients nga programa naman sang Department of Health.
Makakuha naman ang Department of Labor and Employment sang P14.9 billion bilang ayuda sa displaced workers, samtang ang Department of Transportation naman ang may yara sang P2.5 billion para sa fuel subsidies sa transportation sector.
May yara naman sang P1 billion para sa Department of Agriculture agud nga mabuligan ang corn farmers kag fishermen sa mahal nga presyo sang gatong.
Iban pa nga kadtuan amo ang 115.6 billion para sa Pantawid Pamilyang Pilipino Program; P25.3 billion para sa Social Pension for Indigent Senior Citizens; P19.9 billion para sa Protective Services for Individuals and Families in Difficult Circumstances; kag P4.4 billion para sa Sustainable Livelihood Program.
Ginpatpat sang Malacañang ini nga ayuda nga plano nga ihatag matapos ginreport sang Philippine Statistics Authority nga nagsaka pa sa 7.7% ang inflation rate sa Pilipinas nga amo ang pinakamataas sa sulod sang nagligad nga 14 ka tuig.
Ginpahayag naman ni House Speaker Martin Romualdez nga target sang Kamara nga ma-ratify ang proposed P5.268-trillion national budget antes mag-Christmas break ang Congress sa Disyembre 17.
