ILOILO – Wala nag walk-out si Iloilo Gov. Arthur Defensor Jr. sa ginpatigayon nga pagsinapol sang Regional Inter-Agency Task Force sang Lunes, Hulyo 6.
Matandaan nga humalin sa aga tubtub sa hapon ang ginpatigayon nga pagsinapol apang sang udto, wala na ang presensya sang gobernador.
Sa interview sang Bombo Radyo kay Defensor, iya ginpahayag nga nagpin-ot ang iya pamatyag rason nga napilitan siya nga magpaidalom sa laboratory test sa hospital.
Suno kay Defensor, mahimo nga ang paglain sang iya pamatyag ang tuga sang masami nga pag-inom sang kape kag pagbatyag sang stress.
Sa pihak sini, ginpahayag ni Defensor nga maayo ang resulta sang tanan niya nga laboratory test kag natukiban man niya nga mabaskog ang iya tagipusu-on.
Kun siya lang ang pamangkuton, ginpahayag sang gobernador nga luyag gid niya nga patapuson ang pagsinapol agud maathagan tuhoy sa pagsulundan may kaangtanan sa pagbaton sang Authorized Person Outside Residence rason nga nagdesisyon siya nga magpatuman sang border restrictions.
Bangud sa pila ka mga rason, ginkasugtan sang mga gobernador sa Western Visayas nga dulaon na lang ang border restrictions sa bug-os nga rehiyon.
