Ginpaanggid ni Iloilo City Councilor Nene Dela Llana sa isa ka bana ang mga gamit sang gobyerno nga indi dapat pagpahulam ukon ihatag sa iban bangud indi ini maayo.
Ini nga pahayag ni Dela Llana ang may kaangtanan sa isyu nahanungod sa paghulam ni Councilor Sheen Marie Mabilog sa service vehicle sang Office the Vice Mayor.
Nangin dako ini nga isyu matapos nakit-an ang amo nga salakyan sa gwa sang isa ka mall sa syudad sang nagligad nga Domingo.
Una na nagpaathag si Mabilog nga ginhulam niya ang salakyan agud magbakal sang school supplies para sa “Balik Eskwela Project” para sa mga barangay.
Natukiban man nga student permit pa lamang kag indi professional license ang ginauyatan sang driver sang amo nga salakyan.
Sa interview sang Bombo Radyo kay Dela Llana, iya ginpahayag nga indi na dapat pagbirahon pa sang publiko si Mabilog bangud suno sa iya, nakapaathag naman ini.
Suno kay Dela Llana, ang nagpahulam sang salakyan amo ang may sala.
Pahayag niya, maathag sa layi nga nagasiling “potestas delegata non delegari potest” nga nagakahulugan nga indi pwede i-delegate sa iban ang na-delegate na kag applicable ini sa mga elected officials.
Ginainsister ni Dela Llana nga ang may dako nga salabton diri amo ang opisina sang bise-alkalde bangud nagpahulam ini sang salakyan nga wala kuntani nagakadapat.
Nahibaluan nga gin-refer na man sa Committee on Good Government, Public Accountability, and Justice ang pagpatigayon sang imbestigasyon angot sa amo nga insidente.
