GUIMARAS – Ginreklamo sang isa ka utility sang Jordan Municipal Hall si Guimaras Vice Governor Atty. John Edward Gando bangud sa ginapahayag pagsapote sa iya.
Sa interview sang Bombo Radyo kay Edgardo Galon, 59,utility sa Jordan Wharf, iya ginpahayag nga ginsumbag siya ni Vice Governor Gando kahapon.
Suno kay Galon, yara siya sa entrance sang pantalan kag nagapanukot sang fee sang gulpi lang may nagdulog nga van sa iya atubang kag ginpamangkot kun sa diin siya.
Sang nag-ako si Galon nga siya ang ginapangita sang bise gobernador, diri na kag ginsumbag siya sang natungdan kag sang iya mga bodyguards.
Sang nakita na kuno ni Gando nga nagadugo na ang naidalom nga mata ni Galon, ginsugo na niya ang iya tinawo nga untatan na ang pagsumbag.
Nagapati naman si Galon nga nag-ugat ang kaakig sa iya sang bise gobernador bangud sa pagpanagtag niya sang outbound pass sa diin nagbaisay sila sang isa ka staff sang provincial legal office.
Ginpanindugan man ni Galon nga ang bise gobernador ang nakita niya nga nagsumbag sa iya bangud wala ini nagasuksok sang face mask.
Nakahanda naman si Galon nga magpasaka sang kaso batok sa bise gobernador.
Gintawag naman ni Vice Governor Gando nga kabutigan ang pato-pato sang nasambit nga utility worker.
Sa interview sang Bombo Radyo kay Gando iya ginpahayag nga nag-ugat ang isyu sang Lunes, Agusto 10 sa diin ginsugo ang isa staff sang provincial legal office nga si Mr. Allan Amante nga magbulig sa Jordan Wharf.
Diri kag nakita ni Amante si Galon nga nagapinagusto sa pagpanagtag sang outbound pass nga paglapas sa ila pagsulundan.
Suno kay Gando, gintabog pa ni Galon si Amante kag may paaman pa nga mga istorya sa diin gintawag niya nga mango kag ginbuyayaw ang mga opisyal sang Guimaras.
Kahapon, Agusto 13, matabok kuntani sa Syudad sang Iloilo ang bise gobernador kag sang yara na sila sa Jordan wharf, diri na kag nag usisa sila kun sin-o si Edgardo Galon.
Sa ulihi nagbais ang staff ni Gando kag si Galon sa diin ang bise gobernador pa ang nagpatunga.
Ginatawag naman ni Gando si Galon nga basa baba kag kag diwalwalan nga klase sang government employee.
Ginhangkat man sang bise gobernador si Galon nga magpasaka sang kaso kag ginpanugyanan nga handaan man sini ang mga counter charges nga ipasaka batok sa iya.
