ILOILO CITY- Naglab-ot na sa kapin P160M ang balor sang halit nga ginbilin sang Bagyo Paeng sa imprastraktura sa Iloilo.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office, iya ginpahayag nga nagalakip ini sang mga nagkalaguba nga taytay, mga dalan, mga flood control projects kag government facilities.
Suno kay Bionat, sa agrikultura naman, kapin sa P87M ang halit sa humayan, maisan, livestock kag fisheries.
Naapektuhan naman sang bagyo ang 760 barangays kun sa diin naglab-ot sa 100,488 pamilya ukon 389,201 indibidwal ang apektado.
71 naman ka mga balay ang totally damaged kag masobra 500 ang partially damaged.
Samtang, sa mga casualties pito na ang narecord sang probinsya nga nagalakip sang tag-isa ka casualty sa Miagao, San Joaquin, Zarraga, Ajuy, Igbaras, Tigbauan kag Passi City.
