Nagsaka na sa kapin P200 million ang balor sang halit nga ginbilin ni Bagyo Agaton sa sektor sang agrikultura sa bilog nga Western Visayas.
Sa latest update nagikan sa Department of Agriculture (DA) Region VI, yara sa P189.6 million ang production loss sa mga pananum kag livestock sa rehiyon.
Indi pa ini pinal nga data bangud nagasululod pa ang reports nagikan sa iban nga local government units (LGUs) nga ginsul-ob sang tubig-baha.
Sa interview sang Bombo Radyo kay James Earl Ogatis, information officer sang DA Region VI, iya ginpahayag nga 11,348 metric tons ang naapektuhan sang bagyo kag 12,620 ka mga mangunguma ang naisip nga apektado.
Yari ang pagpahat-pahat sa sektor nga pinakanahalitan:
Humay – P176.2 million ang pierde sa produksyon
Livestock and Poultry – P7.4 million ang halit
High-value crops – P3.02 million ang halit
Mais- P2.8 million ang halit
Sa probinsya sang Iloilo, 18 pa lang ka banwa ang nakasumite sang report kag ang pinakanahalitan amo ang Northern Iloilo.
Sa Abril 16 nga data, pito ka mga LGUs sa probinsya sang Iloilo ang nag-deklarar na sang state of calamity agud nga magamit ang calamity funds.
Ini nga mga banwa amo ang Sara, Lemery, Passi City, Batad, Concepcion, Ajuy kag San Enrique.
