Ginpanginwala sang web admin sang MetroBalita.net nga si Rodel Jayme nga siya ang yara sa likod sang kontrobersyal nga Ang Totoong Narcolist videos sa diin nagpakilala ang isa ka lalaki nga si alyas Bikoy.
Ang video ang naga-angot kay Presidente Rodrigo Duterte, sa iya duha ka mga anak nga sanday Paolo “Polong” Duterte kag Veronica “Kitty” Duterte amo man sa pila ka mga negosyante sa iligal nga droga.
Suno kay Jayme, ginapanindugan niya nga indi siya si Bikoy kag indi man siya ang nag-upload sang videos sa social media.
Dugang pa sang natungdan, ginpasibangdan lamang siya sa buluhaton nga wala niya ginhimo kag wala siya sang may nahibaluan.
Ginakabig ni Jayme nga pag-traidor ang ginhimo sa iya bangud gin-upload ang video nga wala siya nakahibalo.
Gin-ako niya nga ginpahimo siya sang website kag ginhatagan man niya sang access ang nagpahimo.
Handa naman si Jayme nga mag-coordinate sa mga otoridad agud nga mahibaluan kag makit-an ang mga tawo nga yara sa likod sang video.
Gin-file na sang National Bureau of Investigation (NBI) ang reklamo nga inciting to sedition batuk kay Jayme.
Nahubaluan nga gin-search ang balay ni Jayme sang mga NBI agents sang Abril 30 kag gindakup matapos matukiban nga siya ang registrant kag administrator sang website.
