Magapakigkita si US Vice President Kamala Harris kanday President Ferdinand Marcos Jr. kag Vice President Sara Duterte-Carpio subong nga adlaw, Nobyembre 21.
Kagab-i sang nag-abot si Harris diri sa Pilipinas para sa iya tatlo ka adlaw nga trip nga amo ang iya sunod nga aktibidad matapos ang pagtambong sang Asia-Pacific Economic Cooperation economic leaders meeting sa Bangkok, Thailand.
Suno sa US Embassy, ang nag-welcome sa US official sa iya pag-abot sa pungsod amo sanday US Ambassador to the Philippines MaryKay Carlson, US Embassy Philippines Deputy Chief of Mission Heather Variava, Philippine Ambassador to the US Jose Manuel Romualdez, Pasay City Mayor Imelda Calixto-Rubiano, Congressman Antonio Calixto, kag Spokesperson of the Vice President Reynold Munsayac.
Buwas naman, Nobyembre 22, bisitahon sini ang Palawan, ang teritoryo sa Pilipinas nga isa sa pinakamalapit sa West Philippine Sea.
Si Harris ang highest-ranking American official nga magabisita sa isla nga kaiping sang Spratly Islands.
Sang Sabado, una na nga ginpahayag ni President Bongbong Marcos nga ang pagbisita ni Harris sa Palawan ang indi man makaapekto sa relasyon sang Pilipinas kag China.
Anum na ka tuig ang nakaligad matapos nagdaog ang Pilipinas batok sa China sa ila pag-claim sang areas nga natuon na sa exclusive economic zone sang Pilipinas.
Apisar sini nga landmark victory, nagapamalibad ang China nga kilalahon ang ruling sang Hague-based Permanent Court of Arbitration kag padayon sa gihapon nga nagabutang sang ila nga mga barko kag presensya sa ginaagawan nga teritoryo.
