Sa iya speech antes nagpadulong sa Indonesia para magtambong sa Association of Southeast Asian Nations (ASEAN) summit, ginpahayag ni President Ferdinand Marcos Jr. nga ang hoarders kag smugglers gid lamang ang rason kun ngaa nagapanglakaak ang presyo sang bugas sa mga merkado sa pungsod.
Ini ang rason suno sa iya sa pagpaguwa sang Executive Order No. 39 kun sa diin ginmandu ang P41 per kilogram nga price cap para sa regular-milled rice kag P45 per kilogram para naman sa well-milled rice.
Epektibo ini subong nga adlaw, Septyembre 5.
Ginpaathag sini nga wala siya kuntani sang plano nga pahilabtan ang merkado, apang nagapanghilabot na ang hoarders rason nga kinahanglan na nga magpatunga ang gobyerno.
Suno kay Marcos, apisar nga yara siya sa Jakarta, padayon niya nga tutukan ang sitwasyon sa sektor sang bugas sa pungsod.
