Magapakigkita ang pila ka mga myembro sang Kamara sa mga tiglawas nagikan sa oil industry agud nga makahimo sang win-win solution sa tunga sang asud-asud nga semana sang pagsaka sa presyo sang gatong.
Ang imbitado sa pagsinapol sa Batasang Pambansa Complex sa Quezon City subong nga adlaw amo ang mga myembro sang House Committee on Energy, mga opisyal sang Department of Energy kag mga tiglawas sang industry groups nga Independent Philippine Petroleum Companies Association kag Philippine Institute of Petroleum.
Yara man ang mga representatives sang dalagku nga kumpaniya sang produktong-petrolyo diri sa pungsod kaangay sang Petron Corp., Pilipinas Shell Petroleum Corp., Chevron Philippines Inc., Total Philippines Corp. kag Flying V.
Suno kay House Speaker Martin Romualdez, lapaw na sa kontrol sang sin-o man nga tawo ang nagakatabo subong nga saka sang presyo sa gatong sa bug-os nga kalibutan.
Apang sa amo nga pagsinapol suno sa natungdan, ang istoryahan amo ang paagi kag mga suhestyon kun paano mapahagan-hagan ang epekto sini sa Filipinos kag magpangita sang common ground sa areas kun sa diin may kontrol pa ang gobyerno.
Lakip sa ginalantaw nga posibilidad amo ang pag-review sang excise tax ukon ang value-added tax sa oil kag petroleum products — depende sa plano sang Malacañang kun mapasa na sang Kamara ang report pagkatapos sang ila nga meeting.
Ang isa pa ka plano ang pagkumbinse sa manufacturers nga ipaiway anay ang pagpatuman sang saka-presyo sa basic food commodities nga resulta man sang saka sa presyo sang produktong-petrolyo.
Nahibaluan nga ang ipatuman nga price increase buwas nga adlaw amo na ang ika-11 nga sunod-sunod nga semana nga may saka sa presyo sang gatong diri sa Pilipinas. #
